يا سلام على رام الله .... يا سلام .. يعني مش عارفه من وين أبلش ..
الشوارع أنضف من هيك ما في ! والأمن بتلاقي على كل مفرق وبكل شوارع .. يعني أنا بس هاليومين اكتشفت قديش في عنا طاقات بشرية طارحة حالها كأمن ... كمية مش بطاله ! قوات بالهبل ! بس شكلو لما يجتاحوا الاسرائيلية بيكونوا باجازه مرضية !مهو المرض كمان بيجتاح .. مش مهم برضو ! الغايب عذره معه !
وصلني وعلى ذمة الراوي ! انو في 450 جندي من المارينز في رام الله .. هادا غير الجايين مع الأخ بووووش!
يعني الألسن بتقول انو 880 شخص رح يكون الطاقم على بعضه !
يعني اذا فرضنا انو في خطأ بالرقم خلونا انقول 800 جايين ! غير بوش طبعا!
هادول ال 800 احسبوا قديش رح يدعمو الاقتصاد الفلسطيني ! السياحة رح تتحرك !
يعني افرضو كل واحد اشترى كوفية فلسطينية ام ال 40 شيكل ! ما بظن يسترخصو ويشترو المقلده ! هاي 800*40 .. بس شوي أحسبها ........ 32000 بطلعو على ضمانة الآله حاسبه ...طبعا هادا بس من الكوفية ..
معقول ما ياخد الواحد فيهم Souvenir لصاحبه ولا لابنه ! خلونا ما انبالغ Souvenir مع خبز طابون ولا جبنه بيضاء .. خلونا انقول كمان 50 شيكل المعدل من كل فرد ! 800 *50 .. كمان 40000 شيكل هادا بالقليله ... لا ما في مجال يسترخصو.. بعدين هدول بس من يوم واحد ... غير الأكل البدنا انبيعهم اياه وجبات !
هاذا غير مشتريات بوش! هادا خود عاد ! كل الهدايا بتوقع اتكون كوفيات ما بين فلسطينية وحمراء ! الحمراء هي لصحابه في كندا !
انا الصراحة زيارته هاي مش حببتها ! انسان مش مزبوط !
ضعفان هو عفكره .. انبهت عالتلفزيون !
بكره الجامعة امعطلة والمدارس امعطله .. وشبه ممنوع التجول .. وقرفونا طيران وطيارة طالعة وطياره نازله
حس أمني عالي ! ابصر رئيسنا لما يروح شو وضعو بيكون ..
ليش عطلونا !! هلأ لما انروح عندهم بيعطلوا الطلاب زينا ؟؟ ولا بوش جايب ولاده يلعبو مع ولادنا برضه !! صحيح! شكلو عندو بنات من عمري ! زياره عائليه ! نعم صحيح كل صحابه جايين ,,, ورايس كمان ! هاي رح تلعب لحالها أو ,,,, ولا بديش أذم فيها .. محترمه !
يعني لو بايدهم كان نقلونا على دوله تانيه لحد ما يخلص اجتماعه ! طيب اذا هالقد هو حساس من وجودنا .. كان حكى من قبل .. كان بعتنالو أبو مازن بتكسي طلب !
هو لو انو امنيح كان بيجي بلا حرس مطمن ... بس هو عارف حاله امقصر معنا !
بيقلو عدلت .. فأمنت .. فنمت !
ع فكره اولمرت اموجهن ! اليوم زودها عالتلفزيون .. مجدو لبوش .. شكلو بيعرفو من قبل ! أو بدو منه اشي !
عاد فش أحلى من الصراحة ! بس هو اولمرت برضو مش مزبوط !
بكمللكم تحليلاتي بعدين .. تعبت !
said:
said:
من فلسطين